Is green expensive?

October 21, 2016

 

လွန်ခဲ့တဲ့ အပတ်ကပဲ တရုတ်ပြည် ရှန်ဟိုင်းက တုံကျိတက္ကသိုလ်နဲ့ ကုလသမဂ္ဂသဘာဝပတ်ဝန်းကျင်ဆိုင်ရာအစီအစဉ် တို့ပူးပေါင်းပြုလုပ်တဲ့ အာရှ-ပစိဖိတ်ခေါင်းဆောင်မှုပရိုဂရမ်ကို တက်ရောက်ခဲ့ပါတယ်။

 

“SDG ဘာလဲ၊ ဘယ်လဲ“ - အစီအစဉ်မှာ ရေရှည်တည်တံ့ရေးအတွက် ကုလသမဂ္ဂရည်မှန်းချက်များ (SDG) ၂၀၃၀ ကိုအဓိက ဆွေးနွေးကြပါတယ်။ SDG ဟာ MDG ထက်ပိုပြီးလွှမ်းခြုံမိတာတော့မှန်ပါတယ်။

SDG မှာ ရည်မှန်းချက် ၁၇ ခုရှိပြီး၊ ပစ်မှတ်ပေါင်း ၁၆၉ခုရှိပါတယ်။ အထူးသဖြင့် သဘာဝပတ်ဝန်းကျင်နဲ့ဂေဟစနစ်ဆိုင်ရာ ရည်မှန်းချက်တွေပါဝင်လာတာကောင်းမွန်ပါတယ်။ အဲဒီ့အတွက် ရံပုံငွေတွေလဲ ပိုကုန်ကျမှာ သေချာပါတယ်။ အစီအစဉ်မှာ SDG ရဲ့ ထိရောက်မှုကို ငြင်းခုံကြပါတယ်။ ရေရှည်တည်တံ့ရေးကိုသွားနိုင်ဖို့ရာမှာ Human Dimension လို့ခေါ်နိုင်မယ့် လူတွေရဲ့ အပြုအမူနဲ့တွေးခေါ်ပုံတွေကို ပြုပြင်ပြောင်းလဲနိုင်ဖို့ဟာ အရေးကြီးဆုံးဖြစ်ကြောင်း ၀ိုင်းဝန်းဆွေးနွေးကြပါတယ်။

 

သို့သော်လည်း SDGကိုပြန်ကြည့်ရင် အဲဒီ့ရှုထောင့်ကို တိတိပပမတွေ့ရပါဘူး။ ဥပမာ - ရေရှည်တည်တံ့မှုနဲ့ပတ်သက်ပြီး အဓိကကျတဲ့ စွမ်းအင်ကဏ္ဍမှာဆိုရင် ပြန်လည်ပြည့်မြဲစွမ်းအင်တွေကို အသုံးပြုနိုင်ဖို့ နည်းပညာနဲ့ငွေကြေးတွေရှိပေမယ့် လောင်စာနဲ့ရေနံ ဓာတ်ငွေ့ အသုံးပြုမှုတွေ မလျှော့နိုင်တာတွေကိုကြည့်ရင် လူသားမျက်နှာစာနဲ့ဆုံးဖြတ်ချက်ချမှုတွေကို သတ္တိရှိရှိအလေးပေးဖို့ လိုအပ်နေတယ်ဆိုတာတွေ့ရပါတယ်။

 

“ရှန်ဟိုင်းမိုဒယ်” - ရှန်ဟိုင်းမြို့မှာ ခေတ်မီပြီးသဘာဝနဲ့ လိုက်လျောညီထွေတဲ့ မြို့ပြစီမံမှုကိုတွေ့ရပါတယ်။ လေ့လာရေးအဖြစ် ရှန်ဟိုင်း expo နဲ့ကျူမင်း ကျွန်းကိုသွားကြည့်ခဲ့ပါတယ်။ ရှန်ဟိုင်း expo ကတာ့ တရုတ်ပြည်အစိုးရရဲ့ အစိမ်းရောင်နည်းပညာ တီထွင်ဆန်းသစ်မှုအတွက် စီမံကိန်းကြီးဖြစ်ပါတယ်။ အံ့မခန်းပါပဲ။ ကျူမင်းကျွန်းကလည်း ကမ္ဘာ့သဘာဝခရီးသွားမြို့အဖြစ် မြှင့်တင်မယ့် ယွမ်သန်းပေါင်းများစွာတန်တဲ့ နှစ်ရှည်စီမံကိန်းဖြစ်ပါတယ်။ စိတ်ဝင်စားစရာကောင်းတာက အဲဒီ့စီမံကိန်းအတွက် လယ်ယာစိုက်ကွင်းတွေနဲ့ ဒေသခံပြည်သူတွေကို ရွှေ့ ပြောင်းစေခဲ့တယ်လို့ဆိုပါတယ်။

 

“လူသားကဏ္ဍ ” -  ကျွန်တော် တစ်ပတ်တာ ရှန်ဟိုင်းကအပြန်မှာ မေးခွန်းတစ်ခုမေးမိပါတယ်။ အဲဒါကတော့ “ရေရှည်တည်တံ့မှုဟာ ဈေးကြီးသလား” ဆိုတာပဲဖြစ်ပါတယ်။ ရှန်ဟိုင်းကို ကြည့်ရင် လှပသာယာပြီး အားကျလောက်တဲ့ စီမံကိန်းတွေ ပြည့်လျှံနေတာပါပဲ။ အဲဒီ့နောက်ကွယ်မှာ တရုတ်အစိုးရရဲ့ ရင်းနှီးမြှပ်နှံမှုအင်အားက မနည်းလှတာသေချာပါတယ်။

 

ဒီလိုမဟာအစိမ်းရောင်စီမံကိန်းတွေရဲ့ ဒေသခံပြည်သူတွေအပေါ်သက်ရောက်မှု ဘယ်လိုရှိသလဲ၊ ဒါဟာသူတို့ကိုယ်တိုင်ကရောလိုလိုလားလားဖြစ်ချင်တာလား။ အစိုးရကပဲ ဦးဆောင်ရင် တစ်ကယ်ရော ရေရှည်တည်တံ့မှာလား။

 

ဖွံ့ဖြိုးမှုအင်အားရှိတဲ့နိုင်ငံတွေအနေနဲ့ ပတ်ဝန်းကျင်ထိန်းသိမ်းဖို့ ငွေကြေးနဲ့နည်းပညာတွေ လက်လှမ်းမီလေတော့ အဆင်ပြေနေတာပေါ့။ ဖွံ့ဖြိုးဆဲနိုင်ငံတွေအတွက်ရော ဘယ်လိုမိုဒယ်မျိုးတွေနဲ့ဆောင်ရွက်နိုင်မလဲ။ ကျွန်တော်ကတော့ လူသားကဏ္ဍကို ပိုမိုမြှင့်တင်ခြင်းဟာ အားလုံးအတွက် လက်လှမ်းမီတဲ့ ချဉ်းကပ်မှုအဖြစ်မြင်ပါတယ်။

 

“မြန်မာ့အလားအလာ၊ စဉ်းစားစရာ” - အနှစ်နှစ်ကာလက ဘက်ပေါင်းစုံနိမ့်ကျမှုတွေကနေ ရှေ့ကိုအဟုန်နဲ့ လှမ်းဖို့ပြင်နေတဲ့ စီးပွားရေးပြုပြင်ပြောင်းလဲမှုတွေ၊ ရင်းနှီးမြှပ်နှံမှုအလားအလာတွေကြားက ကျွန်တော်တို့မြန်မာနိုင်ငံရော ဘယ်လိုပုံစံနဲ့ “စိမ်း” မလဲဆိုတာ အားလုံးအလေးအနက် စဉ်းစားကြဖို့လိုမှာဖြစ်ပါကြောင်း PK Forum ကတဆင့်မျှဝေလိုက်ပါတယ်။

 

 

Please reload